黎克小姐

//Ala樣靚身材正，個人高大行路又婀娜多姿，一出場簡直地都震埋， 所以我哋都嗌佢做黎克小姐，黎克特制個黎克呀。黎克小姐好鐘意連環結婚， 每一段婚姻都維持唔到好耐， 結婚嘅原因亦都令人匪夷所思。 有一次佢嫁咗比個榨菜公司嘅PR， 呢個人原本係委託佢打官司嘅客戶， 佢本身被老闆不合理解僱，黎克小姐幫佢贏咗官司之後復職但佢都仲係好驚比老闆蝦， 於是黎克小姐同佢結婚保護佢，點知佢老公居然開始狐假虎威，喺公司作威作福，仲有埋第三者， 然後佢哋就離咗婚。 跟住下一任老公係的士司機， 黎克小姐同佢結婚係因為司機每日接送來往律師樓同法院都笑笑口任打唔嬲。 但係佢好快就覺得悶，然後自己買咗車就離婚。

佢一路結婚又離婚， 直到差唔多三十五歲， 覺得婚姻都不外如是所以就停咗兩年， 然後唔知聽咗邊個講呢個年紀好快會停經，驚生唔到仔所以又開始搵老公。 從來都冇諗過要小朋友嘅佢，突然間癲咗咁樣以呢樣野為唯一目標， 日日都著到好sexy咁樣出席朋友聚會， 一入門口就即刻除淨件好透好短嘅衫， 好似公司職員一放工即刻除低條呔咁樣。通常大概飲到第三杯佢就開始嚟料。 大吵大鬧，狂數佢啲前夫， 一係就喺度假喊。 飲到喪失理智就行勻全場逐個男人錫一啖。又突然間望住自己心口條事業線， 伸隻手入去摷個巨胸出黎，然後好proud咁問「正唔正呀？」 然後佢唔知點樣識咗個細佢好多嘅作家， 閃婚之後好快得償所願有小朋友。 但好景不常，佢開始散播謠言話比老公打，又話佢喺出面玩女人，叫我哋幫手勸佢老公離婚。 因為佢講得太多我都煩，所以就去咗佢老公公司嗰度傾下， 點知佢老公捉實我話「求你幫下我呀，我要同佢離婚呀！」 原來佢收咗佢老公十五萬埃磅做聘禮作為上床嘅條件，但係一路都唔肯簽收據， 最後我好辛苦先勸掂佢放老公一條生路， 非常之不情願咁交張收據出黎。

再之後佢識咗一個喺奧地利搞話劇團嘅埃及人， 好快就冧掂人哋同佢結婚， 仲成功游說新老公接埋佢個仔去奧地利住。 呢段婚姻維持咗兩年(已經係最長㗎喇)，今次佢睇中咗一個喺政界話到下事嘅奧地利人， 於是佢就開始計劃: 首先氹掂老公帶佢返埃及探親， 喺鄉下返奧地利之後就日日撩交鬧， 跟住去法庭告佢老公喺埃及嘅時候打到佢流產。實情係佢喺埃及嘅時候已經一早整定啲醫生證明同埋假嘅報案紀錄， 仲全部拎曬去大使館翻譯同加簽，又整到自己成身瘀， 佢老公百口莫辯，唯一有一樣嘢救到佢就係法官睇文件留意到黎克小姐原來已經結過7次婚， 佢老公極有可能係被陷害， 於是就罰錢了事同埋禁止佢再進入Klagenfurt。 最後佢賠上名譽同金錢，被迫去Salzburg重新開始，而黎克小姐就如願同奧地利政客結婚， 聽講黎緊佢仲有意參選國會選舉添。//