جزيرة تاء في هونج كونج

شوفوا يا جماعة حرف “التاء” المحفور على جانب التل في الجزيرة دي؟ ليها قصة تاريخية..يوم من الأيام..كان يا ما كان..في قديم الزمان وسالف العصر والأوان.. واحد مصري زهق من حياته في الصعيد باع أرضه وأرض أبوه واشترى مركب عشان يسافر العالم. بس المشكلة انه عمره مشافش البحر وطبعا معرفش الملاحة إزي وبقى تايه عن الطريق بسرعة. أخيرا وصل جزيرة صغيرة في شرق آسيا بعد عدة أشهر في البحر، قال يانهار اسود شكلها جزيرة مش مأهولة!!! هاعمل ايه بقى..الميه والأكل اللي معايا خلص طب خليني أكتب رسالة في جانب الجزيرة عشان أهلي هيشفوها من بعيد لما يجي يلحقوني.كان عايز يحفر في الصخر “أنا تايه أرجوكو إلحقوني – مع تحياتي، أخوك حسن المنوفي” بس الجملة دي طويلة أوي وغالبا هيموت قبل ما يخلص كتابتها. فكر كويس وقرر كلمة “تايه” تكفي، فبدأ يحفرها في الصخر، بس هو مكانش قادر يكمل المشروع لأنه تعبان جدا.. اتكعبل من العطش والجوع ووقع في البحر ومات.والتاء (ت) اللي شايفينه دلوقتي على جانب الجزيرة أول حرف لرسالة حسن المنوفي الأخيرة لأهله