佢個腦如同新車未落地一樣咁新淨

//如果有一日大腦移植手術係可行嘅， 我一定會推介病人用Mohamed Hareedy個腦， 因為佢個腦如同新車未落地一樣咁新淨。 佢份人好樂天， 就算個天塌落嚟佢都係笑笑口。 佢成日行到兩手fing fing架下架下好似胳肋底有膿瘡咁樣， 心口毛又露咗出嚟，周圍去八卦，好似乜叉都關佢事。 佢做親嘅嘢冇一件成功， 但係佢仍然有謎一般嘅自信。

佢本行係出版社印刷， 冇份工超過兩個月。 佢有份出版過好多書， 其中有啲都幾好賣或者成功引起輿論， 但係呢個人非一般咁蠢並唔係浪得虛名， 每一次都係賺唔到錢，因為佢次次印完就是但用成本價賣返出去。 佢行事魯莽不顧後果， 有時諗嘢好似細路仔咁樣。 佢好鍾意將本護照擺喺後褲袋 (雖然係從來冇出過國嘅)， 喺咖啡店一坐就係幾個鐘，個屎忽出汗浸到本護照一頁一頁咁甩出嚟， 但係佢又傻唔曬， 特別有保存好個人資料嗰一頁用黎做身份證明文件，遇到警察查身份證佢就懶巴閉咁show出黎。

有一晚我同佢兩個喺Talaat Harb 廣場附近吹水， 咁啱有遊行示威，見到現場有軍裝部隊戒備亦都有便衣。隔左一陣阿sir落order收隊，軍裝同便衣全部上車走人。 我哋睇完熱鬧都準備走，咁啱Hareedy嗰日著得同啲便衣差唔多, 個頭又剪左陸軍裝， 我地經過架警車嘅時候阿sir叫停Hareedy: 「 你仲慢吞吞喺度做乜L嘢？快啲上車啦！」最詭異嘅地方係Hareedy又真係上， 佢半個身都入左車之際我即刻拉住佢「咩事呀你？阿sir叫啲手下咋！」佢居然話坐警車遊下車河都好，阿sir笑到收唔到聲。

呢篇專欄出街之前我有比過Hareedy睇， 我幫佢用咗假名， 條友仔居然問我呢篇文講緊邊個。。。 當佢知道係講緊佢之後， 佢話「既然係關於我，梗係要落我個真名啦！」 篇文出咗街之後冇幾耐有班麻煩友慫恿佢告我誹謗，點知Hareedy居然覺得我係全世界唯一明白佢嘅人，對於篇文開頭佢嘅解讀係咁樣： 形容我個腦新淨其實係一個讚美，就好似食物用保鮮紙包住咁樣，好過你哋班人個腦已經過曬期啦！//